عيوب سيارتك اللى مجربها

[ابـــوتـــركـــي]

السلام عليكم

هالموضوع فكرته منقول من كذا منتدى ولفايدته حبيت انقله هنا .

كل واحد يعرض وش عيوب سيارته حتى لو كانت المحبوبه له :)
محنب راعين حساسيات لذلك نعرض المشاكل فقط اللى صارت من السيارات اللى شريناها وجربناها .

بعرض لكم كم تجربه من ناس ملكوها :

__________________________________________________ ________________

سأبدا بالمرسيدس (1999 - 2005)
عيوب السياره

تبدأ عيوب السياره من بعد 80 الف كم.

1. كسر القير وذلك لعدم الصيانه لانه الوكاله تقولك زيت القير ما يتبدل لان القير الكتروني وهذه المعلومه اثبتت عدم صحتها وان اكثر سيارات بودمعه الي اخترب قيرها كان زيت القير محروق علماً بان القير عندي ما اخترب لاني كنت اغيره كل 40 الف كم.

2 . الهدروليك الامامي لانه يعتمد على ضغط الهواء والغطاء العلوي مصنوع من الربل فمجرد انه يصير ثغب بسيط تنزل السياره من الامام ولازم تغير اليمين واليسار علشان ما تختل ميزانية السياره ومكلف جداً .

3 . ربلات الشيالات الاماميه بسرعه تتلف ( ماتتحمل وزن السياره ) وتصيير السياره يطلع منها صوت عند المطبات والشيال الواحد يكلف تقريباً 1500 درهم.

4 . العدادات وهو عيب غير شائع تنطفي وعيونك ما تشوف الا السواد ولازم يتغير ويكلف 5000 dh.

5 . الابواب الشفط وهو خراب دائم.

مزايا السياره

1. المكينه والقير 100% . ممتاز

2 . الاشياء الاسهلاكيه مثل السفايف (البريكات) رخيصه.


__________________________________


المرسيدس موديل 2003 - 2005 فئة ال 55 Amg
موتر وايد حلو صراحه بس عيبه كل 20 الف كيلو تقريبا السوبر شارج يخترب
يستحسن انه يكون عليه ضمان الوكاله

مثل اي موتر سبورت, لازم تبديل التواير كل 10,000 كيلو مب مثل باقي المرسيدسات تقريبا 40 الف كيلو و بعدين اتبدل

بعد ال 50 الف كيلو وايد اعطال


___________________________________


بي ام دبليو ام 5 و ام 6 موديل 2005 - 2006

جربت ال ام 5 السنه اللي فاتت والحين اجرب ال ام 6, السيارتين حلوين يوم بتسرع فيهم بس وايد وايد يقهرون و يخلون الواحد عصبي يوم يمشي على راحته

يعني اذا دوم داعس انصح فيهم

الدفريشن مايستحمل دعاس
السسبنشن نفد بعد 18,000 كيلو

كل 3000 - 4000 كيلو لازم اتزيد زيت حق المكينه وهاي سالفه طويله عشان قياس الزيت يكون بالكمبيوتر, يعني زيد شويه وبعدين خذ لفه وبعدين شوف كم زاد, وزيد زياده وخذ لفه ثانيه عشان اتقيس مره ثانيه !!!! واذا زدت الزيت اكثر من اللازم.. خطر !!!!!!


_______________________________________


انفينتي Fx 45 2004

جربت بعد الانفينتي, موتر فنان وقوي جدا

عيبه الوحيد كل سيرفس لازم ابدل سفايف ورى او جدام او مخرطة الدرامات
البريك قوي بس يستهلك ابسرعه


________________________________________


Audi A8L


أبصراحة من أفضل السيارات التي أستعملتها .... وعيوبها قليلة ( مثل صندوق الخلفي للسيارة الاتوماتيكي والبيرنقات ) فقط مع العلم الاستخدام فوق 100000 كلم ، والشي المميز الي لاحظتة في السيارة لما أيحين وقت التشيييك كل 15000 ولا وديتها الوكالة تتعطل الشاشة ( التيلفزيون ، الراديو ، السي دي ، النفيجيشن ) يعني غصبن عنك بتسيير أتشيك


_______________________________________



HSE الرنج روفر من احلى سيارات الدفع الرباعي ... السيارة ممتازة و الاحلى انه صرفية البترول فيها معقولة جدا .
من مشاكلها الراديو يخترب وايد, المشكلة الثانية انه الستيرينج و الفصوص الجانبية تقشر دايما.
و لكن الوكالة ممكن تغيرهم دام انه السيارة تحت الضمان.

ضمانها وايد حلو ممكن يوصل لل 250 الف او خمس سنوات و لكن لا يشمل كل شي.
السيارة قمة في الروعة اذا كانت بعقد صيانة.

بس الرنج لا تقرب منه اذا كان بدون ضمان


__________________________________________



جيب شيروكي من 1997-2001

المزايا:


لذة في السواقة
أداء عالي وسرعة استجابة
المكيف باااااااااااااااااااااارد
قوي في الرمل والقار بعد
قليل الاعطال
قطع الغيار رخيصة ( كرسي مكينة ب 30 درهم + بوشات ب 25 + سفايف ب85!! الجامبين ب 75 درهم !! تقول عندك كرولا مب جيب!!)
صرفية البترول معقولة مقارنة بالسيارات الاخرى
اذا تسوق هذي السيارة .. وترجع تسوق فورويل ثاني .. تكرة عيشتك لانة ماسقت فوريل ثاني لة نفس التجاوب

العيوب:

السنسر مال المكيف وايد يخترب ويخلي المكيف يثلج

الجلد مال السكان بسرعة يتقطع من النص

الفص اللي يشغل المسجل بسرعة يخترب

البريك مب هاك الزود

في مشكلة في الفيول بمب تخلي الموتر يقطع اذا كان البترول على الربع أو اقل ( كل الجيبات تقريبا)

المروحة الكهربائية تحترف بسرعة ( و الحل أنك اتشل البوية و انته بترتاح و المروحة ما بتشتغل بشكل دايم )

يرفع حرارة شوي فالصيف ( والسبب أنه الثلاجة والمنفول فوق بعض)

البوشات اللي جدام بسرعة ينفدن بس رخاص يعني في كل سنة بتشتري اربع بوشات ب 100 و تبديلهن ب 180

واللي يضايجني بعد انه السيارة تبند على 190!!!


__________________________________________


2002 - 911 كاريرا
الحمدالله لا مشاكلل ولا اعطال ...
مشيتها تقريباً 110000 كم .... و اصين فيها اشيا بسيطه , الي هي تستهلك على فتره زمنيه .. مثل ال A-arm هي تمسك ال Suspension و لانه السياره سبورت و جامده .. ... و كان تبديله ب 1000 درهم .... و غيره ال Water pump على ال 80,000 كم ... بس اكثر شي يقهر فيها هو ال MAF sensor ال حساس لكميه الهوا المتدفق Mass air flow sensor هذا يوم يخترب السياره تكسل و ما تسحب عدل ... يعني عادي اي سياره كجره تروح عنك ... تبديله يكلف 900 درهم

و في البورش شي طبيعي .. انه بين فتره و فتره .. عند تشغيل السياره .. اتدخن شوي .. هذى شي معروف في البورش من الموديلات القديمه .. و لانه طبيعة المكينه هيه Flat 6 يعني السليندرات منبطحه Boxer engine و عند الدعاس ال زين يتسرب شوي ( اقصي الحالات) و هذا الي يخلي السياره تتدخن عند الاشتغال ... ...
-------------------------------------------------------------------------------------
فراري 2001 F360 مودينا جير F1
اسمها فيراري و سيكل .... بسبة الجير ... الفرق بين ال F1 و الغيار العادي .. فرق السماء و الارض .. ال F1 تعييسس .. (اول دفعات) المشكله الاولى ... الكلتشات يحترقن بسرعه ... عادي كل 2000 - 4000 كم ...
الشي الثاني ... ما تتحمل دعاس في الحر ... عادي ... تروح السياره .. تحترق من الحراره .. و يا مكثرهن الي احترقن .... حتى هنيه في البلاد ....
السنسور (حساس) في القزوز O2 sensor بسرعه يخترب و يعطيك جك انجن (check engine) فولت Fault
.... سعره مسك في محله .. و هذا شي ايجابي .. و هو الموديل الوحيد من الفراري الي مسك سعره !
... و العيب الي يخليك تعيف السياره هو .. اذا اتعطل فيها شي .. الوكاله كجره كجره كجره ... معامله مثل الزفت .... و مصنع الفراري والخيبتين بعد ... اذا القطعه مب متفوره ... اصبر كمن شهر الين ما يصنعولك وحده ... لهاذا السبب الفراري سياره .. شكلها يوحي الى السرعه لاكن دايمن اتحصلها تمشي شوي شوي .. لانه راعيها ايخاف يدعس و يخترب فيها شي .. و تلوع جبده الين ما يصلحونها ... الوكاله تعيسه ... في وكالة التيوتا تحصل احترام اكثر و انته مودي كورولا ... عن الطاير و انته مودي فيراري ... ما جنك دافع دم قلبك ... !
بس الشي الوحيد الي يحببك في السياره انك تكون النجم في الشارع .. و مليون واحد و وحده يصورونك ... ههههههه و من هناك السياره صوت بس .. ماشي باور ...
<<< اليديده F430 يقولون انها ممتازه ... على تجربة واحد من الشباب .. بس سعرها غالي .. تقريباً دبل سعر المودينا F360 !

[ابـــوتـــركـــي]

مشكله البى ام 2005 هو المكيف مايبرد بسرعه بعض المرات احوط ومنزل الدريشه لين ما يظهر الهوا الحار .

__________________________________________


الأول وأنتوا أحموا

شريت سيارة مرسيدس Ml430 سنة 2000 كانت معقوله بالنسبه لسعرها 170 ألف درهم من الوكالة
كان لونها بيضاء وبيج من الداخل كان شكلها يعجبني ولكن الناس تعلق بأنها كانت تشبه سيارة نزلت في أيامه (كانت دايو بس نسيت الموديل بالضبط، بس هيه نفسها الي تتسوق ألحين بأسم كيا سورينتو)
أفضل ما فيها:
*زر الدقمة أو بمعنى ثاني فيها غيار الغير من الخفيف إلى الثقيل للسواقه في المناطق الوعرة
*كانت سايرة لا هي صغيرة مثل السوزوكي او الرف 4 ولا كبيرة مثل الأستشن او الباترول او الي اكبر منهم كلهم الجمس والسوبربان
*كان سعر السيرفس معقول ومقبول (بعد موديل 2003 صارت من Ml430 إلى Ml500 صار السيرفس مالها مبالغ فيه، الظاهر كانوا يقارنون مع البي أم دبليو أكس 5 )
أكبر عيوبها:
*كانت بالوعة للبترول وما زالت (ml500 و Ml350 طبعاً مب تجربة ولكن سألت الي عنده الموديلات الجديدة) كنت اروح الدوام الصبح والمساء اروح المعهد وكنت اعبيها كل يوم 100 درهم!!! سنة 2001 من يصدق هذا الكلام؟ كنت امشي 100 كلم تقريباً فاليوم او اقل بس اعبيها كل يوم وعشان ما ابالغ كنت اعبيها كل يوم ونص
*كانت سواقتها مثل النيسان بترول ، يعني ثقيله في السواقة واللفات او الأنعطافات يعني، تحسها ثقيله
*كانت تهتز بعد ما تتجاوز سرعة 160كلم، حتى اني كنت اقول للشباب انها مثل السيكل، السكان يلعب ويهتز ويرتج
*كانت بريكاتها ظعيفة بالنسبة لواحد رجله على الريس مثلي.


بعدين شريت Bmw X5 موديل 2001 وكانت 4.4 وكان سعرها 235 ألف درهم
كان لونها عنابي وبيج من الداخل، شكلها كان حلو بس الشباب شبهوها بسايرة سانغ يونغ
أفضل مافيها:
*كانت سواقتها ما توصف بصراحة سيارة سبورت سريعة قوية وسواقتها كأنك تسوق صالون سبورت لكن بشكل فورويل.
*كانت ما تصرف بترول أبداً (طبعاً الي جرب اي موديل بي ام دبليو كان بعد 95 لين اليوم بيعرف شو اقصد، وخاصةً إذا بتقارنها مع المرسيدس سواء كان بودمعة او بوعيون تراه يشرب اكثر من البي ام) كنت أعبيها مرة إلى مرتين في الأسبوع بدون مبالغة.
*كنت امشي فيها بسرعة 240كلم في الخطوط وكانت كأنها سيارة صالون وبدون خوف، ويوم يكون الجو معاك تنزل 260 وبعدين يقفل.
*عمري ما اشتكيت من كمبيوتر او غير او غيره مع أني انسان ريلي على الريس على طول مع أني مشيت فيها اكثر من 100 ألف كلم، مشكلة صغيرة بس مرت علي وهي كانت معروفة على وقتها، وحصلت مرتين، الزجاج الخلفي اليمين او اليسار لما نزل للأخير رفضت تتسكر وبعدها بفترة طويلة صار للزجاج الثاني ، كانت مشكلة الموتور الي يرفع الزجاج صغير وطبعاً بدلوه على الضمان.
أكبر عيوبها:
*كانت تشييكاتها غالية بصراحة، كانوا وكالة البي ام دبليو يقارنونها مع فئة السابعة يعني بسعر غالي. وغير هذا الصراحة ابد ما في شي ثاني!
*كانت الجامبيلات او التعليق مال السيارة سبورت، يعني إذا واحد مب متعود على سيارة سبورت على طول بيشتكي بأنها تنطط

البورش كايين تيربو 2005 وكان سعرها 370 ألف درهم
بيضاء وبيج من الداخل
أفضل مافيها:
*سيارة مكينة وبس يعني سريعة قومه وخط
*الناس تشوفك بنظرة غير لأنك راكب بورش
أكبر عيوبها:
*بالووعة بترول، تعبيها ب120 إلى 150 وتفضي بسرعة وخاصة إذا كنت مثلي دوم تدعس، لا والله حتى على سرعات هادية بعد تشرب
*سواقتها ما اقدر اوصفلك هل هي سبورت او صالون، مب مثل البي ام دبليو اكس فايف، فيها شي غلط في السواقة، مافيها متعة مب عارف اوصفه بصراحه.
*طبعاً لا تفكر تدخل الوكالة ومافي في جيبك كاش او بطاقة فيزا بلمت كبير شوي لأن السيرفس غالي، وقطع الغيار غالية، بدلت بريكات بمبلغ خيالي ما اقدر اقول بكم الصراحة، لكن اقولكم انه بسعرهم واحد من ربعي قال هاي سعر سيارة صغيرة من ماركة تويوتا (؟؟)


طبعاً هذه سيارات شريتها شخصياً وجربتها، وألحين بذكر سيارات جربتها، يعني بدلت مع احد الربع او أجرتها:

فولسفاغن طوارق
جربت 3 موديلات، موديل 6 سلندر، و8 سلندر، و10 سلندر (ديزل)
أفضل ما فيها:
*الشكل بصراحة وايد عاجبني
*سيارة كبيرة بالشكل والمضمون
*سواقتها تقريباً مقبول مقارنه بأنها فورويل
أكبر عيوبها:
*قطع غيارها غالية
*تصرف بترول (6 و8 سلندر بترول، أما 10 سلندر ديزل فتراني أجرتها في ألمانيا لمدة أسبوعين وكانت قوية والصرفية مقبوله نوعاً ما)
*احد الزملاء يشكي من مشكلة حصلت معاه ومع اكثر من واحد موديل 6 سلندر، تفصل الكهرباء وتسكر السيارة في نص الشارع

رنج روفر
أفضل مافيها:
*سيارة بريطانيه فخمة واقفة، وإذا جلست فيها
*نظرة الناس لك لأنها رنج
*صرفية قليلة للبترول (محركات بي ام بدليو ولكن تم الإستعانه بمحركات فورد بعد سنة 2004 على ما أضن وما حصل لي اني جربتهم، ولكن يلي التجربة السوبر تشارج في الأسفل)
أكبر عيوبها:
*سيارة ثقيلة في سواقتها، على الفات او الإنعطافات، كأنها بانوش مب سيارة، وفي القومه ضعيفة وفي الخط تقعد تنطط (مشكلة قديمة ولم يتم حلها)
*قطع غيار غالية والسيرفس زبالة (ولكن بعد ان استلم الوكالة الطاير الصراحة ما سمعنا غير كل كلام طيب)
*سيارة تملها بسرعة
*مشاكل كمبيوتر وكهرباء

رنج روفر سبورت
أفضل ما فيها:
*الشكل والصنع
*الهيبة في الشارع وخاصة وأنها مرغوبة في وقتنا هذا
أكبر عيوبها:
*مشاكل الكمبيوتر
*صرفية للبترول لموديل السوبر تشارج
*سيارة تملها بعد فترة


__________________________________________________ ____



جربت تويوتا كريسيدا و كانت روعه فى كل شيء

جربت لاندكروزر جي اكس و كان ايظا توب

جربت كابرس 92 و كانت روعه الا فى افصاص الهرن تخترب بسرعه و السفايف كمان.

جريت السوبربان 2005 جي ام سي بتواير 20" الصراحه تسوق و كانك تسوق صالون او سياره وسط مب السوبربان الثقيله - حلوه و خفيفه

جربت الاوبل اوميغا 2002 و هي روعه فى الخط رزينه ثابته وبترول خفيف لكن مشاكلها تبدا بعد السنه الثالثه و قطع غيارها غاليه وكالته بن حموده لاباس بهم

ناوي اجرب مرسيدس او بي ام عن قريب ان شاء الله ( لما ترتفع الاسهم هههههههههههههههه)


__________________________________________



عاد هذي تجربتي انا بالفولفو S60 2.4t

السياره موديلها 2001 السياره قويه وتتحمل لكن فيها اعطال واتوقع علشانها يمكن اول دفعه لانها بدايتها نزلت في بدايه 2001 ...

السياره خرب فيها مروحه المكيف وكانت الحراره مظبوطه ولاارتفعت ولا نزلت لكن المكيف على طول يفصل .. وغيرتها وبعدين معد خربت .
المره الثانيه خربت طرمبه البنزين لكن السياره ماوقفت ابد .. وهذا اللى مستغرب منه اللهم تهرب بنزين وريحه البنزين فاااااااااااااااايحه ويوم وديتها قالوا الطرمبه ويوم غيروها ظبطت لكن السياره ماطفت ومسكت فيها خط وهذا اللى مستغرب منه !
وبعدين خرب الراديتر وغيرته وكان رخيص وسعره بـ 1400 مع شغل اليد ...
وهذي ابرز الخرابات ...

ياليت نسمع من كل واحد عن سيارته :)

[bashar_255]

فكرة ممتازة

و هذي السيارات اللي مرت علي بالترتيب

بيجو 307 محرك 1.6 مديل 2003 فاكنها وكالة أول دفعة

عزم ضعيف للغاية بتسارع من 0 الى 100 في 14 ثانية

الموتر يتحمل كرف و مشاوير ما دام انك محترمه لاكن بتصيبك مشاكل مثل سنسر الإيرباق حساس اقل ضربة و يضرب لك الكمبيوتر حقه و قيمته 2000 ريال بالإضافة الى ان الإير باق ما يشتغل الا في مواقف نادرة جداً بالإضافة الى انها ضيقة جداً بالخلف

أبلغ ما قيل لسيارتي يوم ودعتها انه ضربها صاروخ من طيارة حربية F16 مصوب على وجه السيارة بدون ما يشتغل الإير باق و على فكرة كل من شافها قال لي عظم الله أجرك .. الا على فكرة من كان سايقها ؟ ( مهو منظري ما كان يوحي بأني طلعت من الفاجعة ذي :D )


مرسديس شبح 300 ce 24 مديل 1991

محركات شبح المنيوم 6 سلندر مع قير 5 تعاشيق تماتيك

الموتر هذا جبار و عزم خارق الا انه قيره حساس و نادر يعني اذا سلم عليك اقعد صيح بالإضافة الى انك بيعورك قلبك من أنك تدوس بالموتر لأن صرفية البنزين فيه خيالية للغاية

الموتر نص كربريتر و نص بخاخ
القير نص كهرب و نص بالزيت

مشكلة الحرارة ما حليتها

الموتر كله نص و نص مع اني مشتريه كرت نظيف و بعدته بعد ساتخدام شهرين بدون اسف ثم اشتريت ..


BMW 325I 1994

موتر خيال

السيارة كانت تماتيك و عيبها الوحيد هو أن القير قمة في الحساسية و قيور البي ام الحساسة تعرف بعدد الأفياش حسب ما فهمت و هي الـ 10 أفياش و الـ 14

ثباتها لا يعلى عليه و طبلونها 200 ، محركها بسيط و صيانته سهلة و لها قطع تعديل بالهبل


mustang gt 1990

تماتيك أيضاً أخذت الموتر مدمور دمار لأني عندي رغبة أخلقه من جديد الا اني لاحظت أن أكبر عيب في هذه السيارة هو مقاس الكفرات

225 غير كافية أبداً و مع انه قير تماتيك الا انه يحرق بشكل غير طبيعي في التعشيقة الأولى مع انها 2.4 و الدفرنش 3.08

البريكات ما أقدر أحكم عليها لأني بعد استخدام 10 ايام أكتشفت أنها بدون بريكات نهائياً بالخلف !!!

قطع غيار في منتهى الرخص و شي اسمه حرارة ما فيه بعد ما ركبت عليه رديتر نحاس 3 صفات ( شد بلد يعني )

[عليل الضماير]

أها .. اول سيارة .. ويازينها من سيارة .. ونيت جي ام سي 1500 350 قير 700 موديل 1992

الين اليوم تشتغل ومافيها مشاكل اطلاقا .. ماشاء الله

مرسيدس 1986 فاكها الوالد وكالة وكان مجرد أقتناء بعته عام 2003 على امريكي بـ45000 وكان ماشي 138000

كيلو فقط .. مشكلة المرسيدس المكيف داخل المدينة .. وأدائها ضعيف بحكم انها 300sel

انفنتي Q45 1998 ممتازة .. مريحة مكيف ثلج .. والبنزين مقنع جدا .. بس جلد البلوف راحت وصارت السيارة السيارة

أذا طولت وأنت واقف وشغال الموتر اذا مشيت تدخن خفيف .. زحلقتها .. قطعها بشكل عام معقولة ولاتطلب أبد

فورد قراند ماركيز 1999 السيارة هذي بأقل تعبير تجيب المرض .. ثقيلة وتعليقها زفت .. شلون مدري .. وحرام تصير

V8

بليزر 454 قير عادي .. كربريتر .. ثلاجة .. كام .. هدرز .. ببساطة أكثر سيارة تصرف بنزين .. وأقوى سيارة 4x4

انفنتي G35 Sedan ياباني دفع خلفي جميل .. مافيها شي مميز يخليك تدفع 130000 ريال الا انها دفع خلفي

وتسارعها ممتاز وتعليقها رياضي .. وشكلها مميز وقليل تشوف مثلها بالشارع والين اليوم الحمدلله مافي مشاكل

[$المهندس$]

ولله حياتي كانت كلها دمار :)


اول سياره هوندا Crx مديل 90 كان فيه مشكله في الثبات و الجامه الاماميه نادر حيل حيل

و المجمع السكان مو هدرولك و كان خربان و بسرعه يصير فيه فضاوه .. هذا الي يحضرني ..


الثانيه مرسيدس Sl500 كل اسبوع خربات اول خراب انعواج السبائك :) و بعدين الجنوط كل يوم

تنعوج و البطاريه تخلص و الباب ما يفتح ما ادي شنو هل غباء ؟؟ هذا الي يحضرني ...


الومينا ال اس 2000 هذي منحوسه حيل حيل ... يوم ربل الصبباب يوم ما اعرف ايش ..

يوم المبرد ... بس احلي ما فيها المكيف و المبرد الراديتر ... هذا الي يحضرني ..


اما الكمارو مديل 94 قول شنو الي يشتغل انا اجاوب :)

[@ ابـوفـهـيـد @]

تجرتي الاولى صني 1.3

اذا ريلك حاره وتحب المقاوم بتفشلك وترفع ضغطك

صرفيتها مجنووووونه ماتصرف

مشاكلها

حساس الهوا دلوووع كل ماتلمسه يخرب وسعره بـ 250
كويلات هذي تغثك وسعرها بـ 180
مافيه ثبات لدرجه تدخل دوار بسرعه 60 تزحف
المشكله الاعوص كراسي المكينه كل 6 الاف تغيرهم
الحلو فيها تغير زيت ماتكلفك 30 ريال <<< من زود الفسق اغير الزيت كل 2500 كيلو

اما البريكات زينه ومسكتهم ماعليها