مشروع ورشه

[ekhk]

السلام عليكم
أخوكم إياد من السعوديه طالب في كلية التقنيه قسم الميكانيكا .
إن شاء الله بفتح ورشه خاصه وأبي نصيحتكم (ورشه شامله,ورشة متخصصه)وأبي أخلي فيها قسم تزويد وقسم تعديل للبودي.
أتمنى لو تعطوني بعض من خبرتكم في هذا المجال وإقتراحاتكم.وكم ممكن تكلفني ورشه بهذي الموصفات.
ولكم جزيل الشكر.

[$المهندس$]

السلام عليكم


ولله اخوي التكلفه عاليه اذا تبي تسوي لازم تضبط كل شئ .. اول شئ لازم داينو :)


و فنين خبره و مكان وووووو يعني يكلف .. و من جد وجد


و انشاء الله الشباب يفيدونك ..

[@ ابـوفـهـيـد @]

والله تكلف اذا تبغى شي محترم

العده والاغراض

العماله

الأيجار

لو تخلي ثلاث اقسام
ميكانيكا - وكهربا - وسمكره
السمكره فيها خير من الله

اخوي كمل دراستك اللحين
وبعد الدراسه افتح الورشه لان يبغالها متابعه يوميه ولا يزرفونك العماله

[Rangler]

وعليكم السلام
شف اخوي انا رايي اذا انت مستعد تحط ورشه تزويد..........

نصيحه مني لك انك تجيب عماله حدادين ومتخصصين وهذا يكون مختص في تركيب المكاين
والقص.......
وكذلك تستفيد منه باشياء ثانيه غير الي طرحته.............

ثاني شي الافضل يكون المحل عند مخرطه او بلقرب منها لان اكثر الشغل في التزويد
يحتاج للمخرطه وبكذا انت تستفيد منها من كل النواحي..............

والشي الثالث انا اايد في ورشه التزويد لان الحين الناس توجهت اكثرها للتتطعيس وهذا دليل
على نجاح مثل الورشه هاذي.......................

هذا مجرد فكرة مجربه ونجحت واللحمدلله...................

[عاشق_موستنج2002]

اخوي بشار ليش الاستعجال عالداينو؟؟

خلها بعدين مو احسن

[bashar_255]

اخوي بشار ليش الاستعجال عالداينو؟؟
خلها بعدين مو احسن


انا ما رديت :confused:

[ekhk]

مشكورين , بس ممكن رقم تقريبي للتكلفه لو بسوي ورشه معتبره يعني لو قلنا قسم كهراباء,ميكا نيكا,سمكره,تزويد.
وإلي شاطر يحسبها ويعطيني تكلفت المعدات .
والله يوفق الجميع.

[bashar_255]

قول نص مليون بالراحة بدون فرن :rolleyes:

[@ ابـوفـهـيـد @]

شدعوه بشار
نص مليون وييييييييين

تقريباً كبدايه
تحتاج 200 الف

[ekhk]

بشار هذي مزحه ولا جد.
هو ممكن لحد 400 مقدور عليها مع القروض لكن أكثر مشكله
شكرررررررررررا

[$المهندس$]

و اكثر بعد لا تنسي العدد و الادوات و مكان الورشه تكلفه ....


يعني تبي الشغل العدل كامل و الكامل الله مليون .... مع الورشه .

[$المهندس$]

طبعاً تقدر تسويه بي 200 الف ورشه علي قد الحال اما ال مليون ورشه علي اصوله ..

[bashar_255]

اذا قلنا عن الأخ لأنه يبغي كل شي في الورشة يعني مكان كبير و خلنا نقول بياخذ الورشة ايجار عشان نقلل التكلفة المبدئية

بتكلفه في حدود 75 ألف ايجار في السنة

يبيله 2 كهربائيين و 3 مكنيكين و لأنه يدرس يبيله مدير ورشة

الفيز اذا يبغي عمال صح بياخذ فلبينيين و الواحد يكلف 4000 ريال فيزة غير جيبته و مدري ايش و الزحمة يعني قول 25 ألف للعمال و لأنك توك فاتح لازم تحط في بالك انك بتخسر 3 شهور اقل شي على ما تقدر تغطي تكاليف يعني يبيلك 15 الف رواتب احتياط

مدير الورشة طبعاً بتحط سعودي و خلنا نقول اذا انت في الشرقية يمكن تلاقي بـ2500 في الشهر و 1% من الإيراد

آلات و معدات ما بتقل عن 100 ألف

مكينة شارج و مكاين لحام و مكينة هوا كبيرة و سكاريب و صباين و طاولات حديد و رافعتين و مدري ايش و ديكور مكتب

يعني كذا تصفي على ربع ارنب :d

لو بغيت فرن بيكلفك حدود الـ 100 لحاله
و لو بغيت داينو بيكلفك حدود الـ 500

يعني آخر شغلتين يبيلك تنساهم كبداية للمشروع :)

تحياتي ،،،

[عاشق_موستنج2002]

اسف بشار كنت اقصد المهندس

[ابوشهد]

السلام عليكم
انت طلب مشورتنا وانا ما راح اجاملك بقولك الواقع واعذرني.
اذا فتحت ورشه بالمواصفات اللي قلت عليها بتفشل وبتخسر وبتسكر خلال فتره بسيطه والقرض اللي بتاخذه بيضل هم عل قلبك 5 سنين.
الحماس مطلوب جدا لاكن المبالغه مرفوضه.
بعطيك مثال , واحد من زملانا قرب علي التقاعد واخذ قرض كبير وفتح عده ورش مع بعض يبي يبدا بقوه وتشتغل علي شان اول ما يتقاعد يلقي الشغل حامي والدخل عالي صدقوني يا اخوان خسر وقفل.
انا اشجعك انك تفتح ورشه ولازم تفتح ورشه لانها بتفيدك ماديا وعلميا لاكن لازم تكون ورشه صغيره او متوسطه علي قد ميزانيتك بدون ديون وتابعها ومع المده بتزيد خبرتك باداره الورش وتقدر تتعامل مع مشاكل العمال ومشاكل الزباين وخلال عده سنوات يقدر تتوسع لورشه تخدم طموحك وراح تقدر تعرف اسعار الورش الكبيره اللي مواقعها ممتازه من داخل السوق وبحكم علاقاتك وصدقني يفرق كثير ,يبيعون الورشه علي اللي ما عنده خبره ب 250 و 200 الف لاكن بين اهل السوق تنباع ب 100 واقل .
ولعلمك اغلب ورش التعديل صغار حجم الورشه ما يحدد نشاطك الفنين حقينك هم اللي يحددون.

[ekhk]

والله صدقت أهل شيء العماله الموجوده .
أنا إلي بغيته إني أخذ مساحه وأبداء أفتح قسم قسم ولا ايش رأيكم؟

[ekhk]

أهل =أهم
عفوا على الخطاء

[bashar_255]

أنا معاك و مع أخوي ابو شهد

شوف لك مكان على قدك و خلك مكنيك و كهربا أول شي عشان العمال يتعودو على العمل أول شي

لأنك ما تعرف مقدراتهم و اذا ما يعرفو يصلحو فكيف يزودو ؟

لازم تعلم فيهم حبة حبة فشوف لك ورشة تشيل لها 8-12 سيارة بتكون ممتازة كبداية و اذا ربك وسع عليك شوف لك شي ثاني بعد ما تتخرج لأن اهم شي الإسم

و لازم تسأل اصحابك اللي عندهم ورش عن نذالة بعض الزباين و لازم تكون منظم عشان الزبون يكون منظم وياك

يعني..

تستلم سيارة تفتح له ملف و تعطيه كرت الورشة

يحتاج قطع غيار تتصل له و تشتريها مو لازم هو

تعطيه موعد ابعد يعني توضيب و فك و تركيب مكينة تاخذ يومين لاكن خفايف الشغل اللي تجيك في النص واحد يبي يركب مروحة و واحد يبغي يبدل طرمبة لو شي بياخذ منك 7 ايام عمل فما بتنكبه ولا بتخليه يعيرك في السعر

تصلح شغلة تعطيه ضمان عليها على حسب نوعيتها اذا تستاهل ضمان تشغيل أو ضمان طويل

يعني هالشغلات لازم تاخذ افكار من ورش ثانية :)

تحياتي ،،،

[عاشق_موستنج2002]

زي ما قال بشار

تستلم سيارة تفتح له ملف و تعطيه كرت الورشة

خل نظامك زي المستشفيات جهز عندك برنامج بالكمبيوتر

مثلا تسجل فيه السيارة واسم راعيها ورقم اللوحة كم سلندر...........الخ

طبعا المعلومات تنحفظ عندك لو رجع الزبون

[ekhk]

مشكورين والله على هذي الاقتراحات
يعني أفتح ورشه مساحتها طيبه وأفتح وحده وحده وأجيب عماله ممتازه وأنظم الشغل .
والله هذي الاقتراحات ولا بلاش تسلموا يارواد المنتدى