المساعد الشخصي الرقمي

مشاهدة النسخة كاملة : محتاجين آرائكم المكينه راحت :(

T U R K I
10-12-2008, 02:23 PM
السلام عليكم

شباب انا ركبت كام على مكينة LS1 وبرمجة السياره عند مبرمج معروف ومشيت على السياره 800 كيلو وكل شي تمااام

دست بالسياره دوستين وبعد الثالثه سمعت صوت طقطقه قوييييييه في المكينه

المهم شحنت السياره للمهندس اللي ركب لي الكام مع العلم اني موظب نص المكينه عنده

فك المكينه قالي كل شي عندك انتهى :3rbe069: الكرنك والسبايك والسست والاسياخ والبلووووك والوجيه والبساتم ؟؟؟؟؟؟؟

اللي ابغى اعرفه ليييييييش راحت كل هالقطع ؟؟؟

معقوله من الدعسه ؟؟ ولا البرمجه مع اني واثق فيها ؟؟ او من التركيب ؟؟

يعني لو دافين غاز نقول معذوره :mad:


منتظر ارائكم

سلااااااام
evils1z28
10-12-2008, 04:57 PM
عليكم السلام...بسيطة ولاتشيل هم والله يعوضك...وجهز فلوسك حق ستروكر بدل ماتوضب مرة ثانية

ليش صار اللي صار عندك عدة احتمالات ..

* يمكن مكينتك كانت فيها مشكلة " التوضيبة ماكانت اوكي "
* تركيب الكام
* البرمجة

لو كانت السيارة اوكي ..ادعس بها ماعندك مشكلة وحتى بغاز
bashar_255
10-12-2008, 05:16 PM
ويش الكام و ويش السبرنجات ؟ و هل السبرنجات مستخدمة ؟

ويش اللي ركبته في المكينة مستخدم ؟ ويش وضع المكينة قبل التوضيب ؟
mubarak
10-12-2008, 07:23 PM
الله يعوضك باحسن منها

معقوله من الدعسه ؟؟ ولا البرمجه مع اني واثق فيها ؟؟ او من التركيب ؟؟

ممكن يا اخوي انت مركب كام كبريتر وهذي المشكلة صارت عندنا بالشرقية بسيارتين (( لا يسمح بذكر الاسماء ))
يعني الغلط من الشركه الي طلب منها يعني كتبو لك كام Ls1 بس ما حدد النوع لان اول كام نزل للكبريتر وبعدين نزل للبخاخات
ابـــوتـــركـــي
10-12-2008, 08:09 PM
معقوله كل شي راح ؟

اتوقع من اللى وضب لك .. لان مهب الى هالدرجه كل شي يروح بساتن وكرنك

ياليت توضح لنا بالظبط وش ركبت في المكينه ؟


يعني كتبو لك كام Ls1 بس ما حدد النوع لان اول كام نزل للكبريتر وبعدين نزل للبخاخات

مافيه كام للكربريتر وكام للبخاخ .. لان اللى تحت مايفرق معه كربريتر ولا بخاخ .
احمد
10-12-2008, 10:42 PM
الLS1 كامها رولر
و كامات الرولر نادر جدا تخرب من بدايه التشغيل و الاستخدام مو مثل كامات الفلات القديمه

الكرنك و السبايك و البساتم و البلوك
يعني ميه بالميه اللي وضب المكينه ما يعرف يشتغل و لا يعرف يعاير ضغط مسامير ثابت الكرنك و مسامير الذرعان
و يمكن اصلا ما عنده هندل ضغط

السست و الاصياخ احتمال كبير جاب لك كام لفته عالي
و المسافه بين رتينر السبرنق ( السسته ) و الفالف قايد ما تسمح بهذا اللفت يعني تخلي السبرنق يكبس لآخره و يضرب الحديد في الحديد
و هذا يخرب السبرنقات و يطعج الاصياخ و احتمال كبير يكسر التكايات و يعور الكام
و نفس الشي يعني اللي ركب المكينه ما يعرف يشتغل
في اختراع اسمه spring height micrometer رخيص و يقدر يشتريه من summit
و لا على الاقل يدور المكينه برا قبل ما يطبقها كامله و يشوفها كيف تدور

عموما
اما ان اللي اشغل على المكينه ما هو داري وش الشغله
او انه يبغى ينصب عليك و يخليك تدفع فلوس و بيقول بنجيب لك قطع من برا و هو ما بيجيب شي و بيطبقها من جديد و بتنفقع من جديد

الاحتمال الاخير ان البرمجه مو زينه
و صارت عندك صرقعه عنيفه جدا كسرت البساتم
لكن حتى لو صرقعت المكينه ما لها علاقه بالاصياخ و غيرها
يعني هذا الاحتمال مستبعد خصوصا ان المكينه لا عليها غاز و لا شواحن

بعدين كيف حكم ان كل هالاغراض خربانه ؟ هو فك المكينه اول ؟
شوف لك واحد من اصحابك يفهم في الميكانيكا شوي و قولو له روينا اللي تقول عنه قطعه قطعه

بعدين نصابين زي كدا المفروض تذكر اسمائهم عشان ما احد يشتغل عندهم مره ثانيه
bashar_255
10-12-2008, 11:33 PM
هو على العموم الأخطاء واردة و أنا حاط في بالي عدة تصورات ما تخرج منها

1- تركيب قطع مستخدمة تعبانة مثل السبرنجات ولا قاس قوة السبرنق أصلاً أو أنه سير التايمنج تعبان.
2- تركيب قطع غير متناسقة.
3- خطأ في توضيب المكينة.
4- عدم تمرين المكينة و تغيير الزيت بعد 1000 كيلو.
5- تركيب طرمبة الزيت بطريقة غلط أو أنها ما اشتغلت و هذي مشكلة معروفة في الـ Ls1 و عشان كذا احنا نركب طرمبة زيت 6.0 اللي تجي في الإسكايلد

عموماً أخطاء المبتدئين في النصف التحتي أما المحترفين فهو دائماً في الفالفترين و النص الفوقي عموماً و اتمنى عدم ذكر أسامي حتى لا نظلم أحد خاصة أن أحنا ما عندنا صورة كاملة عن الموضوع

و الله يعوض عليك
T U R K I
10-13-2008, 10:06 AM
عليكم السلام...بسيطة ولاتشيل هم والله يعوضك...وجهز فلوسك حق ستروكر بدل ماتوضب مرة ثانية

ليش صار اللي صار عندك عدة احتمالات ..

* يمكن مكينتك كانت فيها مشكلة " التوضيبة ماكانت اوكي "
* تركيب الكام
* البرمجة

لو كانت السيارة اوكي ..ادعس بها ماعندك مشكلة وحتى بغاز

المكينه كانت تصرف زيت قبل اركب الكام ومع تركيب الكام غيرت الشنابر وزبط كل شي لاكن المشكلة 90% من التركيب :mad:

البرمجه متأكد منها تمااااااام ولا كان عندي صرقعه ولا شي وكلمت المبرمج قالي لو مشكلتك من البرمجه بصلح سيارتك على حسابي :o

ويش الكام و ويش السبرنجات ؟ و هل السبرنجات مستخدمة ؟

ويش اللي ركبته في المكينة مستخدم ؟ ويش وضع المكينة قبل التوضيب ؟

اخوي بشار الكام من شركة Thunder racing اسمه تراك ومعروف الكام بقوته وارقامه
231/234 .640/.590 112
السبرنجات باتريوت تيتانيوم تتحمل لفت الى 650 وجديده
الكام والاسياخ مستخدمين اقل من شهر
المكينه قبل التوضيب مافيها اي مشكله وكل يوم ادعس فيها وكل شي تمام بس صرفيه زايده بحكم ممشاها

الله يعوضك باحسن منها



ممكن يا اخوي انت مركب كام كبريتر وهذي المشكلة صارت عندنا بالشرقية بسيارتين (( لا يسمح بذكر الاسماء ))
يعني الغلط من الشركه الي طلب منها يعني كتبو لك كام Ls1 بس ما حدد النوع لان اول كام نزل للكبريتر وبعدين نزل للبخاخات
لا ما اتوقع :)

الكام اللي عندي معروف ومجرب وحق ls1


معقوله كل شي راح ؟

اتوقع من اللى وضب لك .. لان مهب الى هالدرجه كل شي يروح بساتن وكرنك

ياليت توضح لنا بالظبط وش ركبت في المكينه ؟




مافيه كام للكربريتر وكام للبخاخ .. لان اللى تحت مايفرق معه كربريتر ولا بخاخ .

كلللللل شي وهذا اللي انا مستغرب منه وخلاني انزل الموضوع :mad:

وانا كمان اتوقع من اللي وضب لكن وش تقول الله يعوض علي :3rbe161:

اللي على المكينه ( كام وسبرنجات دبل وجنزير دبل واسياخ )

الLS1 كامها رولر
و كامات الرولر نادر جدا تخرب من بدايه التشغيل و الاستخدام مو مثل كامات الفلات القديمه

الكرنك و السبايك و البساتم و البلوك
يعني ميه بالميه اللي وضب المكينه ما يعرف يشتغل و لا يعرف يعاير ضغط مسامير ثابت الكرنك و مسامير الذرعان
و يمكن اصلا ما عنده هندل ضغط

السست و الاصياخ احتمال كبير جاب لك كام لفته عالي
و المسافه بين رتينر السبرنق ( السسته ) و الفالف قايد ما تسمح بهذا اللفت يعني تخلي السبرنق يكبس لآخره و يضرب الحديد في الحديد
و هذا يخرب السبرنقات و يطعج الاصياخ و احتمال كبير يكسر التكايات و يعور الكام
و نفس الشي يعني اللي ركب المكينه ما يعرف يشتغل
في اختراع اسمه spring height micrometer رخيص و يقدر يشتريه من summit
و لا على الاقل يدور المكينه برا قبل ما يطبقها كامله و يشوفها كيف تدور

عموما
اما ان اللي اشغل على المكينه ما هو داري وش الشغله
او انه يبغى ينصب عليك و يخليك تدفع فلوس و بيقول بنجيب لك قطع من برا و هو ما بيجيب شي و بيطبقها من جديد و بتنفقع من جديد

الاحتمال الاخير ان البرمجه مو زينه
و صارت عندك صرقعه عنيفه جدا كسرت البساتم
لكن حتى لو صرقعت المكينه ما لها علاقه بالاصياخ و غيرها
يعني هذا الاحتمال مستبعد خصوصا ان المكينه لا عليها غاز و لا شواحن

بعدين كيف حكم ان كل هالاغراض خربانه ؟ هو فك المكينه اول ؟
شوف لك واحد من اصحابك يفهم في الميكانيكا شوي و قولو له روينا اللي تقول عنه قطعه قطعه

بعدين نصابين زي كدا المفروض تذكر اسمائهم عشان ما احد يشتغل عندهم مره ثانيه

اخوي احمد السبرنقات والاسياخ تتحمل قوة الكام وبالراحه

السياره ماكان فيها صرقعه ومستحيل تكون صرقعه يعني البرمجه اوكي ان شاء الله

الميكانيكي فك المكينه وقالي انت وش مسوي بالسياره :3rbe161: قلتله انا ولا انت :d

القطع اللي خربت حاطها بشنطة السياره لين انا اخذها وما اعتقد بينصب علي بس الاكيد انه ورط فيها في التركيب لاني جبتها له في وقت تقريبا بيوضب 20 مكينه :o وعجلت عليه وفي نهاية رمضان

هو على العموم الأخطاء واردة و أنا حاط في بالي عدة تصورات ما تخرج منها

1- تركيب قطع مستخدمة تعبانة مثل السبرنجات ولا قاس قوة السبرنق أصلاً أو أنه سير التايمنج تعبان.
2- تركيب قطع غير متناسقة.
3- خطأ في توضيب المكينة.
4- عدم تمرين المكينة و تغيير الزيت بعد 1000 كيلو.
5- تركيب طرمبة الزيت بطريقة غلط أو أنها ما اشتغلت و هذي مشكلة معروفة في الـ Ls1 و عشان كذا احنا نركب طرمبة زيت 6.0 اللي تجي في الإسكايلد

عموماً أخطاء المبتدئين في النصف التحتي أما المحترفين فهو دائماً في الفالفترين و النص الفوقي عموماً و اتمنى عدم ذكر أسامي حتى لا نظلم أحد خاصة أن أحنا ما عندنا صورة كاملة عن الموضوع

و الله يعوض عليك

اخ بشار كلامك سليم لكن استبعد رقم 1 و 2 و 5 :d

القطع من افضل الموجود عندنا بالسعوديه والعالم كمان :ama3ad: وتتحمل كام اكبر من اللي عندي

ممكن ما مرنت المكينه لكن حتى لو من التمرين ماتروح كل القطع هذي

اتوقع لو السياره موضبه زين مايصير اللي صار ولو صار ماتروح كل القطع اللي ذكرتها

========================

وكثر الله خيركم وزادكم علم وبيض وجيهكم على مشاركاتكم وآرائكم واقتراحاتكم

سلااااااااااام
الشظيه
10-16-2008, 04:46 AM
السلام عليكم
اول شي الله يعوض ان شاء الله يا تركي ومن زمان ما شفتك ولا سمعت منك نتقابل في الماسنجر

وضبت سيارتك في المدينه ولا جده ؟؟؟


وعلى فكره الكام الي ركبته كبيير على المكينه واتوقع انه كان يضرب في البساتم لان على ما افتكر ان اكبر من 230 لازم تسوي فلاي كت للبساتم عشان ما تضرب البلوف في البستم .

بعدين انت ليش طالب كام كبيير قد كدا و 112 وانت تستخدم سيارتك كل يوم ؟؟؟


الله يعينك
الشظيه
10-16-2008, 04:54 AM
بحبشنا في النت شويه لكن طلع انه ما يحتاج تسوي فلاي كت للبساتم :) مع الكام الي ركبته

بس في شي كان غلط في التوضيب من اوله
mubarak
10-17-2008, 04:45 AM
لو تذكر القطع الي ركبتها يكون افضل

يمكن الاخوان اصحاب الخبرات يفدون اكثر
راعي الكابرس
10-18-2008, 05:51 PM
لو في صور للبساتن او للأشياء اللي مكسرة يكون افضل ...
T U R K I
10-29-2008, 11:54 AM
السلام عليكم
اول شي الله يعوض ان شاء الله يا تركي ومن زمان ما شفتك ولا سمعت منك نتقابل في الماسنجر

وضبت سيارتك في المدينه ولا جده ؟؟؟


وعلى فكره الكام الي ركبته كبيير على المكينه واتوقع انه كان يضرب في البساتم لان على ما افتكر ان اكبر من 230 لازم تسوي فلاي كت للبساتم عشان ما تضرب البلوف في البستم .

بعدين انت ليش طالب كام كبيير قد كدا و 112 وانت تستخدم سيارتك كل يوم ؟؟؟


الله يعينك
أهلين حبيبي

وضبتها عند ماجد اكيد تعرفه في جده

الكام مجربينه الشباب وبدون اي مشاكل وكل يوم قومات :d

اتضح في الاخير ان المشكله اللي صارت سببها السبرنقات :mad::mad: طلعت ابو كلب :eek:

بحبشنا في النت شويه لكن طلع انه ما يحتاج تسوي فلاي كت للبساتم :) مع الكام الي ركبته

بس في شي كان غلط في التوضيب من اوله

التوضيب كويس المشكله طلعت سست وانا مشيت عليها ما اهتميت الييين صار صوت السياره مايتحمل يعني بعد ما كل شي اتكسر :mad:

لو تذكر القطع الي ركبتها يكون افضل

يمكن الاخوان اصحاب الخبرات يفدون اكثر

القطع مذكوره في الصفحه الاولى :d

لو في صور للبساتن او للأشياء اللي مكسرة يكون افضل ...

للأسف مافي صور

========================

الحمد لله خلصت السياره وفكينا منها الكام ورجعت الماكينه ستوك

ان شاء الله شهرين او 3 نرجع بخلطه احسن

ومشكوريييييين شباب ماقصرتو :)
bashar_255
10-29-2008, 07:18 PM
اتضح في الاخير ان المشكله اللي صارت سببها السبرنقات :mad::mad: طلعت ابو كلب :eek:






90% من مكاين الريس بدون فورس اندكشن اللي تضرب من الفالفترين .. يا سبرنجات يا جنزير

ركب هالشغلتين جدد أو نظاف قدر الإمكان و احفظ فلوسك
T U R K I
11-01-2008, 12:57 PM
والله يابشار مرتين تضرب علي بسبب السبرنجات

ان شاء الله لنا عوده بمشروع افضل خلال الاشهر القادمه

مشكورين
احمد
11-01-2008, 01:02 PM
يعني في مشكله في التركيب

اما ان اللفت عالي و يصير الرتينر يضرب في الفالف قايد
او السبرنق ما يتحمل الضغط اللي يسببه الكام و ينكسر
عاده اذا الكام يكون عنيف شوي يفضل تحط دبل سبرنق
اذا مو للأداء
يكون للأمان لان لو انكسر سبرنق الثاني بيمسك البلف و ما بيخليه يطيح داخل المكينه
T U R K I
11-03-2008, 09:26 AM
أخوي احمد فيه حاجه اسمها السيت على ما اعتقد اللي هي الورده تركب تحت السبرنق زي الكرسي لها

هذي الشي ماركبها لي احتمال يكون منها لانها هي وظيفتها تثبت السبرنق زين ولا يتحرك ؟؟ والله اعلم

السبرنق أكيد دبل ونفس اللي موجود على الرابط (max lift .650")

http://www.thunderracing.com/catalog/?action=shop&sid=815&pcid=109
احمد
11-03-2008, 12:57 PM
يسموها spring shim
زي الواشر لكن رقيقه
و وظيفتها تخليك تركب السبرنق بالارتفاع المطلوب
مثلا لو السبرنق المفروض يتركب على installed height 1.800 انش
و تركبه على 1.9 بيكون مرتخي و لا بيشتغل صح